சீனாவின் பொது சுங்க நிர்வாகத்தின் தரவுகளின்படி, உலகின் மிகப்பெரிய எஃகு உற்பத்தியாளரான அந்நாடு, இந்த ஜூலை மாதத்தில் 2.46 மில்லியன் டன் அரைகுறை எஃகுப் பொருட்களை இறக்குமதி செய்துள்ளது. இது, கடந்த ஆண்டின் இதே மாதத்துடன் ஒப்பிடுகையில் 10 மடங்குக்கும் அதிகமாகும். மேலும், 2016-ஆம் ஆண்டிற்குப் பிறகு இதுவே மிக உயர்ந்த அளவாகும். அதுமட்டுமின்றி, இந்த மாதத்தில் முழுமையான எஃகுப் பொருட்களின் இறக்குமதி மொத்தம் 2.61 மில்லியன் டன்களாக இருந்தது. இது, ஏப்ரல் 2004-க்குப் பிறகு மிக உயர்ந்த அளவாகும்.

கொரோனா வைரஸ் பெருந்தொற்று உலகில் எஃகு நுகர்வைக் கட்டுப்படுத்தியிருந்த ஒரு காலகட்டத்தில், சீன மத்திய அரசாங்கத்தின் பொருளாதார ஊக்குவிப்பு நடவடிக்கைகளைத் தொடர்ந்து வெளிநாடுகளில் ஏற்பட்ட குறைந்த விலைகள், உள்கட்டமைப்புத் திட்டங்களுக்கான வலுவான உள்நாட்டுத் தேவை மற்றும் உற்பத்தித் துறையின் மீட்சி ஆகியவற்றால் எஃகு இறக்குமதியில் வலுவான அதிகரிப்பு ஏற்பட்டது.